ඔන්න ඉතිං අවුරුද්දේ අන්තිම නිවාඩුවත් ආවා.
විහින්දි මේ නිවාඩුව එනකං මග බලාගෙන හිටියේ. මේ නිවාඩුව එයාට ගොඩක් කැමති එකක්
වුනේ ගොඩක් ට්‍රිප් යන්න පුළුවන් හින්දම නෙවෙයි. ඒ තෙනුක මල්ලි එනවා කියලා තිබුන
හින්දයි. මල්ලි කිව්වේ එයාගේ පුංචිඅම්මගේ පුතා. එයාලා ඉන්නේ ගොඩක් දුර. මොණරාගල -
සියඹලාන්ඩුවේ. මේ නිවාඩුවට ආච්චි ගිහින් මල්ලිව එක්කරගෙන ආවා.
තෙනුක ඉන්නේ හතරේ පන්තියේ. ශිෂ්‍යත්ව විභාගයත්
තියෙනවානේ. අක්කට ඕනේ වෙලා තියෙන්නේ මල්ලියාවත් හොදට ශිෂ්‍යත්වේ පාස් වෙන්නයි.
ඉතිං සෙල්ලම පැත්තකින් තියලා මල්ලිට පාඩම් කියලා දෙන්න විහින්දි ගොඩක් දවසක ඉදලා
ලෑස්ති වෙලයි හිටියේ. තෙනුකත් ගෙදරදි වැඩ කරන්න කිව්වම අම්මට සත්තම දැම්මට අක්කත්
එක්ක යස අගේට වැඩ කරනවා.
තෙනුක කොළඹ එන්න කැමති හේතු ගොඩයි. අක්කා එක්ක
සෙල්ලං කරන එක වගේම ලොකුතාත්තා එයාව ගොඩක් තැන්වල එක්ක යනවා කියලත් එයා දන්නවා.
නිවාඩු කාලේ යන ට්‍රිප් ගැන අක්කා එයාට කියලා තියනවානේ.
"ලොකු තාත්තා.. අපි කොහේ යන්නේ..."
තෙනුක එයාලගේ බාසාවෙන් ම කතා කලා
"කොහෙද යන්ට ඕනේ? ලොකු තාත්තලාගේ ගමේ යනවා
නුවර. අනිද්දා.. එහේ මල්ලියි නංගියි ඉන්නවා. හතර දෙනාටම ඇති වෙනකං නටන්ට
පුළුවන්නේ. හා ද?"
"හා. ලොකු තාත්තා, එහේ විතරයි යන්නේ?"
"හරි හරී... යනකොට එනකොට කොහොමත් තව ගොඩක්
තැන් වලට යනවා. යන ගමන් බලන කොටුව බලන්ට යමු"
"ඈ.... බලන කොටුවට යනවද? ෂෝක්නේ.... "
විහින්දි උඩ පැනගෙන ආවා.
"අක්කා.., ඒ මොකක්? කොහේ තියෙන්නේ... ?
"
"බලන කියන්නේ මුර කපොල්ලක්. ඒ කියන්නේ රජ
කාලේ ආමි චෙක් පොයින්ට් එකක් තිබ්බ තැනක්. උඩරට ආරක්ෂාවට ගොඩක් වැදගත් වෙච්ච
බලකොටුවක් තමයි බලන කොටුව. ගිහින්ම බලමුකො. ..."
කොළඹ නුවර පාරේ කඩුගන්නාවෙන් හැරිලා පොත්තපිටිය
පාරේ කිලෝමීටර පහක් විතර ගියාම බලන කොටුවට යන්න
පුළුවන්. මේක මුලින්ම හදලා තියෙන්නේ පළවෙනි විමලධර්මසූරිය රජතුමා කියලා
තමයි කියන්නේ. කන්ද උඩරටට පිවිසෙන මාර්ගයේ තිබුන ප්‍රධානම බලකොටුවක් තමයි මේ.
සතුරන්ට උඩරට ආක්‍රමණය කරන්නට අසීරු වුන ප්‍රධාන හේතුවක් ලෙසටත් මේ බලකොටුව
හදුන්වන්න පුළුවන්. උඩරටට පිවිසෙන මාර්ගයේ
බලන ගිරි දුර්ගය ට ඉහලින් කදු මුදුනේ තමයි මෙම බලකොටුව තියෙන්නේ. ඉතිං ගිරි දුර්ගය
හරහා එන සතුරන්ට මේ ස්ථානයේ දි තනිකරම ගරිල්ලා ප්‍රහාර තමයි එල්ල වුනේ. ඉහල සිට
මහා ගල් පර්වත පෙරලන එක, බාගෙට කපලා තියන ගස් සතුරා මතට පෙරලන එක වගේ උඩරටට ආවේනික
ගරිල්ලා ප්‍රහාර හින්දා සතුරන්ට ලෙහෙසියෙන් පරද්දන්න බැරිවුන බලකොටුවක් වුනා.
විහින්දි එයා දන්න දේවලුයි ගූගල් කරලා ඉගෙන ගත්තු
තවත් දේවලුයි ගොඩක් දේ මල්ලිට කියලා දුන්නා.
එතන්ට ගියාම අවට ඇති කඳු පන්ති බොහොමයක්ම පැහැදිලිව
දකින්නට පුළුවන්. ඒ වගේම බොහෝ ඈත ට පහත් බිම් ද දකින්නට පුළුවන්. ආරක්ෂක බල කොටුවකට එතන කොයි තරම්ම ගැලපෙනවද
කියලා එතන්ට ගිහින් වටපිට බලනකොට හිතා ගන් න පුළුවන්.
බලක කොටුව අද වන විට සංරක්ෂණය කරලා තියෙනවා. ඒ
තැන ඉදිරි පරම්පරාවටත් දකින්නට ඉතිරි කරන එක බලන්නට යන හැමෝගෙම වගකීමක්.
No comments:
Post a Comment