ටයිමින් බෝම්බෙ

මෙහෙම හෙඩිමක් දාලා කොල්ලෙක් බුකියෙ දාපු පින්තූරයක් තමයි මේ තියෙන්නෙ. ඉතිං ඕක දැක්කම ගොඩක් අතීතෙට ගියා. අපිත් කොල්ලො කාලෙ කරපු ඇට්ටර වැඩ මතක් වුනා.

අවුරුදු දාට කොල්ලො කට්ටිය එකතු වෙලා ගමේම ගෙවල් ගානෙ යනවා. එහෙම ගියාම ගැම ගෙදරකින්ම කාල බීලා වැදලා කරලා එනවා. ඒ අතරේ තමයි එකෙක් පිලිකන්න පැත්තට රිංගලා සාක්කුවෙ දා ඉන්න රතීඤ්ඤා හදුංකූරු එහෙම පාවිච්චි කරලා ඔය ඇටවුම හදලා හංගලා තියලා එන්නෙ. ඉතිං අපි ගිහිං පැයකට විතර පස්සෙ තමයි ඕක වැඩ කරන්නෙ. එතකොට ඉතිං වෙන්නෙ මොකක්ද කියලා හිතගෙන්ට.
හවස් වෙලා ගියාම සමහර ගෙවල් වලට අටවන්නෙ ඔයිට හපන් ඒවා. ඒකට ගන්නෙ හදුන්කූරු නෙවෙයි. මදුරු කොයිල්. මහ රෑ තමයි ඉතිං ගෙදර අය උඩ ගිහිං ඇහැරෙන්නෙ. හොදම ගේම දෙන්නෙ සමහර ගෙවල් වලට. රෑ දහයට, දොලහට, පාන්දර දෙකට විතර පත්තු වෙන්ට ටයිමින් හදලා ගේ වටේ තුන් පැත්තක තුනක් හංගලා එන එක. ඉතිං ගෙදර මිනිස්සුන්ට වෙන්නෙ එදා රෑම ඇහැරලා ඉන්ට. පහුවදාට ඉතිං කුණුහරුප ඉතිරි නෑ. පාර දිගේ බැන බැන යනවා කරපු එවුං දන්නවා නං ඉතිං වෙන දේ හිතාගන්ටකෝ...