Monday, March 14, 2022

කූඩුව ඇතුලෙ ඉන්න කුරුල්ලන්ව පොටෝ ගහමු

සත්තුවත්ත වගේ තැනකට ගියාම දැල් කූඩුවක් ඇතුලේ ඉන්න කුරුල්ලෝ වගේ සත්තු පින්තුර ගන්න ගියාම ටිකක් අමාරුයි. අපි කොච්චර උත්සහ කලත් අපේ ඇහැට කුරුල්ලෝ පෙනුනත් පින්තූරයක් ගත්තම පේන්නේ කොටු දැල තමයි පැහැදිලිව.


ඉතිං මේ ගැටලුව මග ඇරගෙන පින්තූරයක් ගන්න හැටි තමයි මම මේ කියන්න හදන්නේ. පහුගිය දවසක මගේ යාලුවෙක් එක්ක වොටර් වර්ල්ඩ් එකට ගිහාම මට මේ ගැටලුව ආවා. ඉතිං මම එතනදි කරපු විදිය තමයි මේ කියන්නේ.


මුලින්ම ලෙන්ස් එකේ switch එක  manual focus (MF) පැත්තට ගෙනියන්න. එයින් පස්සේ ලෙන්ස් එකේ තියන පොඩි ring එක කරකවන්න පුලුවන් වෙනවා. දැන් අපිට කුරුල්ලව පැහැදිලිව පේන විදියට ඒක කරකවලා ගන්න වෙනවා. මෙතනදි වඩා හොද පින්තුරයක් ගන්න නම් කැමරාව දැල ආසන්නයට ගන්න වෙනවා වගේම කුරුල්ලා දැලෙන් වැඩියෙන්ම දුරින් ඉන්න වෙලාවක් තෝරා ගන්න වෙනවා.

ඒ විදියට ගත්තු පින්තූර ටිකක් තමයි පහලින් තියෙන්නේ.







 
 



Saturday, February 26, 2022

ලයිට් නැති වෙලාවෙ අහස බලමු

අහස හරිම ලස්සනයි. ඒ ලස්සන පේන්නේ නැති වෙන්න එක හේතුවක් තමයි ආලෝක දූෂණය කියන එක. අපි ඉන්න වටපිටාවේ ආලෝකය තියෙනවා නම් අහස හරියට නිරික්ෂණය කරන්න අමාරුයි.

පාසල් විෂය නිර්දේශයේ පවා තරු රටා, ග්‍රහලෝක ගැන පාඩම් තියෙනවා. ඉතින් දරුවන් එක්කලා කරුවල වෙලාවට පොඩ්ඩක් එලියට ගිහින් අහස නිරික්ෂණය කරන්න. තරු රටා වගේම ග්‍රහලෝකත් ඔබට අදුනා ගන්න පුලුවන් වේවි. ඔයාගේ ජංගම දුරකතනයට Stellarium Mobile Star Map එක දා ගත්තා නම් ඒ වෙලාවෙ ඔයා ඉන්න තැන අහසේ තියන දේවල් හරියටම දැන ගන්න පුලුවන්.


කරුවලේ දරුවන් එක්ක වැදගත් දෙයක් කරමු.

Wednesday, January 19, 2022

උඩරට ගෙවතු වනාන්තර Kandiyan Forest Garden

අපේ රටේ තියෙන විවිධ වනාන්තර වර්ග ගැන ඔබ ඉගෙනගෙන ඇති. ඒත් මම මේ කියන වනාන්තර වර්ගය ඒ ඉගෙන ගෙන තියන වනාන්තර වලට වඩා සුවිශේෂ එකක්. සොබා දහම එක්ක ජීවත් වෙන හොදම ක්‍රමයක් විද්වතුන් හදුන්වන ත්‍රමයක්. ඒ වගේම මේ ගැන කෙරුණු පර්යේෂණ බොහොමයක්ම තියෙනවා. එලි දැක්වුන පර්යේෂණ පත්‍රිකා ගොඩක් තියෙනවා. ඒවා බැලුවම තමයි තේරෙන්නේ අපි කොච්චර හොද ජීවන ක්‍රමයක් ගත කරන අයද කියලා.

මේ විශේෂ වනාන්තර තියෙන්නේ නුවර පැත්තෙ. ඇත්තටම වනාන්තර කිව්වට මේවා පුද්ගලික ඉඩම්. පරිභෝජනය කරන ඉඩම්. වගා කරන ඉඩම්. අනිත් අතට වගා කරන පරිභෝජනය කරන ඉඩම් කිව්වට මේවා වර්ෂා වනාන්තර.

ඒක වෙන්නේ මෙහෙමයි. වනාන්තර කියන්නේ සුවිශේෂ පරිසර විශේෂයක්. ජෛව විවිධත්වය ඉතා ඉහළ තැනක්. ඉතිං මේ කියන ඉඩම් වල වර්ෂා වනාන්තර ලක්ෂණ තියෙනවා. ගොඩක් වර්ග වල ගස්කොලන් තියෙනවා. ඒවා ඉබේ හැදුන ඒවා වගේම වගා කරපු ඒවා. වගා කරනවා කිව්වට පරිභෝජන අවශ්‍යතා වෙනුවෙන් වගා කරන ඒවා. ගස්වර්ග හදනවා කියලා සම්පූර්ණයෙන්ම සුද්ද කරලා හදන්නේ නැහැ. ගහක් දෙකක් සුදුසු තැනක් බලලා හදනවා මිසක්.

ඇත්තටම මේ වතුවල ගොඩාක් ගස් වැල් වර්ග තියෙනවා. එදිනෙදා අවශ්‍ය වන එළවලු වර්ග පලතුරු වර්ග කුළුබඩු වර්ග ගොඩක් දේවල් තියෙනවා. අනික ඒවට පොහොර දාන්නේ එහෙම නෑ. සීයට සීයක්ම කාබනිකයි.  ඒ වගේම මේ ගස් කොලන් ආශ්‍රිතව විවිධ සත්තු එහෙමත් ඉන්නවා.

ඉතිං උඩරට ගෙවතු වනාන්තර දකින්න ඒ ගැන ඉගෙන ගන්න පර්යේෂණ කරන්න කැමති නම් එන්න අපේ ගමට. අපේ ගෙදර නැවතිලා අපේ වත්ත පහල ඇවිදලා ඔයෙන් නාලා විනොද වෙලත් යන්න පුලුවන්.

පර්යේෂණ පත්‍රකා හොයන්න ඕනේ නම් Kandyan Forest Garden කියලා ගූගල් එකේ හොයලා බලන්නකෝ.

එන්න කැමති නම් 076 7458267 ට මට කෝල් එකක් දෙන්න. මං ගමේ යන්නේ නිවාඩු දවස් වලට විතරයි. කොළඔ පැත්තේ ඉදලා යනවා නම් මට ට්‍රාන්ස්පෝට් දෙන්න පුලුවන්. යන්න එන්න දෙකටම. එහේ ඇවිදින්නත් පුලුවන් කැමති තැන්වල.

අපේ රට හරිම සුන්දර රටක්.
























Saturday, December 25, 2021

විමලේ අයියා

එදා ඉස්කෝලේ ගිහින් ගෙදර එනකොට ඇවිල්ලා තිබුන රුපියල් හත්දහස් හත්සීයක වතුර බිල දැකලා ඔලුව කොලොප්පන් වෙලා හිටිය මං කරන්නට දෙයක් නැතිව කල්පනා කර කර හිටියේ. ගෙදර ඔක්කොම ටැප් වැහුවත් එක දිගට මීටරේ කැරකෙනවා කියලා දැක්කේ ඒක බැලුවම. ඒ කියන්නේ ගෙදර කොහේ හරි වතුර කාන්දුවක් තියෙකවා.

වැඩේ තියෙන්නේ අපිට මිදුලක් කියලා හරියට නෑ. තියෙන ටිතත් කොන්ක්‍රිට් කරලයි තියෙන්නේ. වතුර බට කොහෙන් කොහාට යනවද කියලා දෙයියෝ තමයි දන්න්. සැක කරන්ට තැන් තුනක් විතර තියෙනවා. එක තැනක දෙහි ගහක් තියෙනවා. තව තැනක අලිපේර ගහක් තියෙනවා. අනිත් තැන තමයි කුස්සියේ සින්ක් එකේ වතුර යන බට ලයන් එක තියන ටික. මොකද එතන කොන්ක්‍රිට් එක බොල් වෙලා. යටින් මීයෝ හාරලා වගේ. ඒ ඔක්කොමත් හරි නාන කාමරේ යට කොහේ හරි බටයක් කැඩිලා නම්.

මම යකඩ ඉන්නක් අරන් කුස්සියේ ඉදුල් වතුර යන බටය තියෙන තැන පොලව කැඩුවා. මට ඉස්මුරුත්තාව හැදුනේ දැකපු දේට. කුස්සියේ ඉදුල් වතුර ඔක්කොම වලට යන්නේ නැතිව උතුරලා ගිහින් මීයෝ හාරපු වලවල් වලට යනවා. ආපු කුණු ගඳට මට ඔක්කාරෙට වාගේ ආවා. මම ඒක ආපහු වහලා දාලා පැත්තකට වුනා. දැන් ඉතින් මේ අවුල ලිහාගන්ට කවුරු හරි හොයාගන්ට කියලා පොඩ්ඩක් එහාට මෙහාට ඇවිදලා බැලුවා. කඩේ පැත්තට ගිහින් බැලුවා. කවුරුත් හොයාගන්ට බැරිවුනා.

වෙලාව හවස හතට විතර ඇති.  කවුදෝ ගේට්ටුවට තට්ටු කරන සද්දයක් ඇහිලා ගිහින් දොර ඇරලා බලන කොට විමලේ අයියා. විමලේ අයියා ඇවිත් තියෙන්නේ හවස මම හැමතැනම කවුරු හරි හොය හොය ගියා කියලා කවුරු හරි කියපු පණිවුඩේකට.

විමලේ අයියා අපිට වෙලා තිබ්බ අකරතැබ්බය බැලුවා. හරි මං වැඩේ කරලා දෙන්නම්. එයා කිව්වා.

“දවසේ කුලිය කීයද?” මම ඇහුවා.

“අරහේ නං තුන්දාහක් දෙනවා”

“හරි. හෙට උදේම එන්ටකෝ”  පහුවදා ඉස්කොල නිවාඩු හින්දා කොහොම හරි මේ ප්‍රශ්නේ ඉවරකර ගන්ට ඔනේ හන්දා මං කිව්වා.

“මල්ලි මට රුපියල් දාහක් දෙන්න පුලුවන්ද?”

විමලේ අයියාගේ මූන දිහා හිනා වෙලා බැලුව මම රුපියල් දාහක් එයාගේ අතේ තිබ්බා. ඒ රුපියල් දාහ මොකටද කියලා මං දන්නවා. විමලේ අයියා කියන්නේ කුඩු වලට ඇබ්බැහි වෙලා ඉන්න කෙනෙක්. කුඩු පැකට් එකක ගාන තමයි එයා ඉල්ලුවේ.

පහුවදා උදේම ATM එකට ගිහ මං රුපියල් දහදාහක්ම අරන් ආවේ මේ වැඩේ කොහෙන් කවදා කෙළවර කරගන්ට පුලුවන් වෙයිද දන්නෙ නැති හන්දා. උදේ හතහමාර වෙනකොටම විමලේ අයියා අපේ ගෙදර.

“අපි කොකටත් දෙහි ගහ යට ඉස්සරලම බලලා ඉමු”

“මාත් ඒක තමයි හිතුවේ. හැබැයි ඔතනින් බට දෙකක් යනවා මං හිතන විදියට. පරෙස්සමෙන් හාරන්න වෙයි.”



උදලු තල දෙකතුනක් හාරපු විමලේ අයියා හෙමීට මගේ ලගට ඇවිත්,


“මල්ලී, රුපියල් දාහක් දෙන්න පුලුවන්ද?”

“ආ.. මං හිතුවේ ඊයේ දාහක් ඉල්ලන් ගියේ උදේට වෙන්න ඇති කියලානේ.”

“ඒක ගෙදර යනකොටත් ඉවරයි” විමලේ අයියා හිනා වෙලා කිව්වා.

මගෙන් රුපියල් දාහක් ඉල්ලා ගත්ත විමලේ අයියා මං ඉක්මනට කනත්ත පල්ලෙහාට ගිහින් එන්නං කියලා පිටත් වුනා. මිනිහා විනාඩි පහළොවකින් විතර ආපහු ආවා. ආපු වෙලාවෙ ඉදලා මෙන්න යකා වගේ වැඩ. මෙන්න පැයක් යන්ටත් කලින් වතුර ලීක් වෙන තැන හොයාගෙන. මට කියලා බටයි ඒ කැලි බැලි ටික ගෙන්නගෙන ලීක් එක හැදුවා. මුල් හින්දා බටේ ඇදවෙලා අලවලා තිබුන තැන් දෙකකින් ගැලවිලා තිබුනේ.

ඊළගට එයා අත ගැහුවේ කුස්සියේ ඉදුල් වතුර යන ලයින් එකේ ලීක් එක හදන්න. අපිට නහය වහගෙන වත් යන්න බැරි වෙන තැන කොන්ක්‍රිට් එක කඩලා ඔක්කොම සුද්ද කරලා බට කැඩුන ඒවා හදලා හවස එක වෙනකොට සම්පූර්ණයෙන්ම කොන්ක්‍රිට් කරලාත් ඉවරවුනා. දැන් ඉතිං මේ මනුස්සටයාට තව වැඩ ඔනේ. ඉස්සරහ රෝලර් ගේට්ටුව දාන වේලේ තාප්පේ කොටසක් කඩන්න වුනා. මං ඇහුවා එතන කොන්ක්‍රිට් කරමුද කියලා. අඩි අටක විතර උසට තීරුවක් දාන්න තිබුනේ. දවල්ට කාලා වැඩේ පටන් ගත්තු කෙනා දෙක හමාර විතර වෙනකොට මෙන්න ඒකත් කරලා ඉවරයි. වටපිට බැලුවම තව කපරාදු කරපු නැති තාප්ප කෑල්ලක් තිබුනා. මං ඇහුවා ඒකත් කපරාදු කරමුද කියලා. හරි කරමු කියපු විමලේ අයියා ලගට ඇවිල්ලා

“රුපියල් දාහක් දෙන්න පුලුවන් ද?”

“එතකොට ඔයාට දෙන්න තියන ගාන හරි නේද?”දාහේ කොලයක් අතේ තියන ගමන් මම ඇහුවා

“හරි හරි.. මං පොඩ්ඩක් කනත්ත පල්ලෙහට ගිහින් එන්නම්කෝ” කියපු විමලේ අයියා විනාඩි පහළොවකින් විතර ඇවිත් ඒ ටිකත් කපරාදු කරලා ඉවර කලා හවස පහ විතර වෙද්දී.  කොහොම හරි මේසෙන් බාස්උන්නැහැ කෙනෙකුයි ගෝලයෙකුයි දෙන්නෙක් එකතු වෙලා දවස් දෙකක් කරන වැඩක් මේ මනුස්සයා තනියෙන් එක දවසින් කලා.

වැඩ කරපු තැන් හැම එකක්ම ලස්සනට අස් කලා. අතුගෑවා. ගත්තු උදැල්ලේ ඉදලාම හේදුවා. පිරිසිදු කලා.

“මං එහෙනං ගිහින් එන්නම්.”

තව රුපියල් සීයෙ කොල තුනක් නවලා මං විමලේ අයියගේ අතේ තිබ්බා.

අපිට අනාගතයක් දීලා විමලේ අයියා එයාගේ එදා දවස ගත කරලා යන්න ගියා.

විමලේ අයියා කියන්නේ දරුවො තුන්දෙනෙක් ඉන්න තාත්තා කෙනෙක්.



Friday, September 3, 2021

මල්වතු අනු නා හිමිට පිළිතුරු ලිපියක්.




                                                                                                                        2021/09/02

අති පූජ්‍ය මල්වතු පාර්ශ්වයේ අනුනායක ස්වාමින් වහන්සේ වෙත

මල්වතු මහා විහාරය

මහනුවර

 

ගරුතර අනනායක හාමුදුරුවන් වහන්ස,

2021 සැප්තැම්බර් මස දෙවන දින ඔබ වහන්සේ විසින් වැඩ වර්ජන අත්හරින ලෙස ගුරුවරුන්ගෙන් ජන මාධ්‍ය හරහා සිදුකල ඉල්ලීමට පිළිතුරු ලෙස ලියමි.

ඔබ වහන්සේ විසින් වැඩ වර්ජන අතහැර දරුවන් වෙනුවෙන් ඉගැන්වීම් කටයුතු වලට සම්බන්ධ වන ලෙසට විවෘත ඉල්ලිමක් කරන ලදි. එම ඉල්ලීම වෙනුවෙන් ගුරුවරයෙක් වශයෙන් මාගේ පිළිතුර ඔබ වහන්සේ වෙත මෙසේ ලිපියකින් ඉදිරිපත් කරමි.

මුලින්ම වැඩවර්ජනයක් යන්න මේ සදහා සුදුසු වචනයක් දැයි මා හට ගැටලුවකි. වැඩ වර්ජනයක් සිදුවීමට නම් රාජකාරි පැහැර හැරිමක් සිදු විය යුතු වන්නේය. එහෙත් මේ අවස්ථාවේ අධ්‍යාපන කටයුතු සිදු කරන ලෙස ගුරුවරු වෙත විධිමත් රාජකාරිමය පැවරීමක් සිදුවී නොමැති බව ඔබ වහන්සේ නොදන්නවා ඇතැයි සිතමි. එබැවින් මේ වන විට සිදුව ඇත්තේ ගුරුවරුන් විසින් තම තමන්ගේ හැකි අයුරින් ස්වෙච්ඡාවෙන් සිදුකල ඔන්ලයින් ඉගැන්විම් වලින් ඉවත් වීමක් පමණී. එය තුල කිසිම රාජකාරි පැහැරහැරිමක් නොමැතිය

එසේම ඔන්ලයින් ඉගැන්වීමට කැමැත්තක් දක්වන ගුරුවරයෙක් වශයෙන් මා හට මෙවැනි ගැටලු රාශියක් ඇත.

ඉගැන්වීම සදහා මා විසින් භාවිතා කල යුතු මෘදුකාංගය කුමක්ද? ඉගැනුම් ඉගැන්වීම් පද්ධතියක් සදහා භාවිතා කල හැකි විවිධ මෘදුකාංග පද්ධති මේ වන විට ඇති අතර විවිධ ගුරුවරු විවිධ මෘදුකාංග භාවිතා කරන්නට ගියහොත් එයින් අසහනයට පත්වන්නේ දරුවන්ය. එබැවින් ඒ සදහා පොදු පද්ධතියක් තිබිය යුතුයි. අධ්‍යාපන අමාත්‍යංශය හෝ වෙනත් අධ්‍යාපන බලධාරියෙක් විසින් එවැන්නක් මේ වන තෙක් නිර්දේශ කර නැත. එසේම එවැනි පද්ධතියක් වේ නම් එය රජය මගින් සපයා දිය යුතු වන්නේය. නැතහොත් ගුරුවරුන්ට එවැන්නක් මිලදි ගෙන තමන්ගේ ඉගැන්වීමේ කටයුතු සදහා භාවිතා කිරිමට හැකියාවක් නැත්තේය. මේ වන තෙක් එවැනි කිසිම දෙයක් සිදුවී නොමැත්තේය.

ඒසෙම ඔන්ලයින් උගන්වනවා යන්න කිසිම ආකාරයට මා හට පැහැදිලි කර ගැනිම අපහසුය. මා කොපමණ කාලයක් උගන්වනවාද? එක් එක් විෂයක් ඉගැන්විය යුතු කාලය කොපමණද? ඉගැන්විම සිදු කරන්නේ කුමන වේලාවේද වැනි කාරණා පැහැදිලි කර ගත යුතුව ඇත. සමහර ගුරුවරු මහ රැ දොලහ පමණ වන තෙක් ඉගැන්විම් සිදු කරන අතර සමහර ගුරුවරු පාන්දර හතරේ පමණ සිට ඉගැන්වීමට පටන් ගතහොත් එය දරුවන්ට මහත් ගැටලුවකි. සමහර ගුරුවරු සතියකට පැය බාගයක් පැයක් උගන්වන අතරෙ සමහර ගුරුවරු සතියට පැය පහක් හයක් උගන්වති. හැම ගුරුවරයෙක්ම පැය හයක් බැගින් උගන්වන්නට ගියහොත් සතියටක පැය ගණන ප්‍රමාණවත් නොවනු ඇත. එසේම ආවරණය කරන විෂය නිර්දේශයේ කොටසක්ද? නැත්හොත් සියල්ලමද?  එබැවින් ඒ සදහා විධිමත් ක්‍රමවේදයක අවශ්‍යතාවය ඇත. එවැනි දේවල් සිදුකල යුත්තේ අධ්‍යාපන බලධාරින් විසිනි.

ඊලග කාරණය අප විසින් භාවිතා කරන උපකරණ පිලිබදවයි. ඔන්ලයින් ඉගැන්වීමට භාවිතා කල යුතු ජංගම දුරකතන, පරිගණක වැනි උපකරණ ඉතා මිල අධික භාණ්ඩ වෙයි. දැනට ගුරුවරුන් විසින් තම පුද්ගලික භාවිතයට ගන්නා යම් උපකරණ සීමිත පිරිසක් ලග තිබුනද ඒවා දිගු කාලිනව භාවිතයට ගැනිම නිසා කැඩි බිදි යාමට ඉඩ වැඩිය. එවැනි විටකද කල යුතු දේ පිලිබදව ගැටලුවක් පවති. උපකරණ මිලදි ගැනිම කෙසේ වෙතත් තමන්ගේ පුද්ගලික උපකරණ භාවිතා කරන විට ඒවායේ නඩත්තු වියදමට වත් යම් දීමනාවක් ලැබිය යුතු යැයි මම සිතමි. ගුරුවරයෙකුගේ ඉතා සුලු වැටුපෙන් ඒවා සිදුකිරිම අපහසු බැවිනි.

එසේම ගුරුවරු බොහෝ දෙනෙක් තාක්ෂණය සම්බන්ධයෙන් අවම දැනුමක් සහිත අය වෙත්. ඔවුනට අදාල මෘදුකාංග සමග කටයුතු කල හැකි ආකාරය පුහුණුව ලබා දීමද වැදගත් වනේනේය. එවැන්නක්ද මේ වන තෙක් සිදුවි නොමැත්තේය.

වැදගත්ම කාරණය වන්නේ මෙයයි. මේ හැම උත්සහයක්ම ගන්නේ දරුවන් වෙනුවෙනි. මෙම ඉගැන්වීමේ කටයුතු සදහා දරුවන් සම්බන්ධ කර ගන්නේ කෙසේද යන්න ලොකුම ගැටලුවකි. රජයම කියන පරිදි ඔන්ලයින් අධ්‍යාපනට පහසුකම් ඇත්තේ රටේ දරුවන්ගෙන් සියයට හතලිහකට පමණී. එසේ වන විට එම පහසුකම් නොමැති ඉතිරි සියයට හැටක් වන දරුවන්ගේ අධ්‍යාපනය වෙනුවෙන් ගන්නා පියවර කුමක්ද?

දහතුන් අවුරුදු අඛන්ඩ අනිවාර්ය අධ්‍යාපනයක් ක්‍රියාත්මක වන්නේ යැයි උදම් අනන ආණ්ඩුවක් තිබුනද මෙම ගැටලු සහගත අවස්ථාවේදි රටේ අධ්‍යාපනය වෙනුවෙන් රජයක් ලෙස ප්‍රතිපත්ති සම්පාදකයින් ලෙස ගත් එකදු ක්‍රියාමාර්ගයක් නැත්තේය.

ගරුතර අනු නායක හාමුදුරුවන් වහන්ස,

මා විසින් ඉහතින් ඇති ගැටලු ඔබ වහන්සේට ඉදිරිපත් කරන්නට හේතුව එම ගැටලු ඉදිරිපත් කරන්නට බලධාරියෙක් නොමැති හේතුවෙනි. කිසිදු බලධරියෙක් එම ගැටලු වලට පිලිතුරු මේ දක්වා ඉදිරිපත් කර නොමැත. ඔබ වහන්සේ ගුරුවරුන් වන අපගෙන් ඉගැන්වීම සිදුකරන ලෙස ඉල්ලා සිටින බැවින්, අප විමසා සිටින්නේ එම ඉගැන්විම සිදුකල යුතු ආකාරයයි. ඔබ වහන්සේ එම කාරණාවන්ද අදාල බලධාරින්ගෙන් විමසා හෝ  අද ආකාරයටම විවෘත ජන මාධ්‍යයයෙන් අපව දැනුවත් කරන මෙන් ඉල්ලමි.   

ඔබ වහන්සේට තවත් චිරාත් කාලයක් බෞද්ධ සාසනයේ අභිවෘද්ධිය වෙනුවෙන් කටයුතු කිරිමට වාසනාව ලැබේවා.

මෙයට

ඉගැන්විමට කැමැත්තෙන් සිටින ගුරුවරයෙක්.


Monday, August 30, 2021

නැවතත් වැඩවසම් යුගයකට.

මා දන්නා ආර්ථික විද්යාවක් නැත්තේය. ඒත් මේ යන විදිය බලන් ඉන්න මට එක එක බහුබූත දේවල් හිතට එන්නේය.

මේ යන විදියට කෙරෙන්නේ රටේ සල්ලි එක තැනකට ගොඩ ගැසෙන එකයි. ඒකෙන් වෙන්නේ ඇති නැති පරතරය වැඩි වෙන එකයි. ඒක එන්න එන්නම වැඩි වෙනවායි.
එක්කෙනෙකුට ආනයනය කරන්න දුන්නම ඒකේ ලාබය කුට්ටිය පිටින්ම එයාට යනවානේ. එතන සල්ලි එකතු වෙනවා.

මට මතක් වුනේ අර පාසල් නිල ඇදුම් දෙන්න කූපන් එකක් දුන්න වැඩේ. ඇත්තටම ඒක රටකට කොච්චර හොද දෙයක්ද කියලා දැන් තේරෙනවා. ඒ කියන්නේ රටේ සල්ලි රට පුරා විසිරෙන එක.
අධ්‍යාපනය ගැන හිතුවොත් දැන් වෙන්නෙත් ඒකම තමයි. ඇති එකා හොදටම ඉගෙන ගන්නවා. නැති එකාට මොකවත්ම නැති වෙනවා. ඇත්තටම කිව්වොත් ගුරුවර්ජනය නිසා වෙච්ච හරියක් නැ. මොකද ඔන්ලයන් ඉස්කෝල වලට ආවේ 40%ක් විතර ලමයි. ඒ යමක් තියෙන කරගන්න පුලුවන් අය. මේ වෙනකොට එයාලගේ අධ්‍යාපනය කොහොමත් කෙරෙනවා. ටියුෂන් පන්ති වලින්. අර 60% ට තමයි මොකවත්ම නැති වෙලා තියෙන්නේ.
රජයේ ප්‍රතිපත්ති වලින් කෙරෙන්නේ ඇති නැති පරතරය වැඩි කරන එක. ඒක වැඩි වෙලා වැඩි වෙලා ගියාම වෙන්නේ ආයෙම වැඩවසම් ක්‍රමයක් ඇති වෙන එක තමයි. මේක ධනවාදය නෙවෙයි. රදලවාදය කිව්වොත් හරි.
තවත් එකක් තමයි, ඔය රජකාලේ හිටියා නේද රදළ කියල කොටසක්. හොදට හොයල බැලුවොත් දැන් කාලේ දේශපාලනය කරන්නේ බහුතරයක්ම ඔය රදළ පෙලපත් වලින් පැවතගෙන එන අය තමයි.
ඉතිං මං ඒකට රදළවාදය කියලා කියන එක වැරදි ද දන්නේ නැහැ.
ඔන්න ඉතිං මං ජෙප්පෙක් කියලා ලේබල් ගහන්න එපා හරිද? මට ඔකුන්ව පෙන්නන්ට බෑ

Monday, August 9, 2021

අධ්‍යාපන ලේකම් ට පිළිතුරු ලිපියක්

මම විදුහල්පති වරයෙක් වුනා නම් අධ්යාපන ලේකම් එවපු මේ ලියුමට මෙහෙම උත්තරයක් රාජකාරි ලිපි ශීර්ෂය යටතේ යවනවා.



ගරු අධ්යාපන ලේකම් තුමනි,
ඔබගේ....... දරණ ...... දිනැති ලිපියට පිළිතුරු වශයෙනි,
ඔබගේ ලිපිය තුලින් දරුවන්ට ඔන්ලයින් ඉගැන්වීම කරනු ඇතැයි ඔබ බලාපොරොත්තු වන බව සදහන් කර ඇත. කරුණාකර ඒ පිලිබදව තවදුරටත් පැහැදිලි කර ගත යුතුව ඇත.
මා විදුහල්පති වරයෙක් වශයෙන් ඔන්ලයින් ඉගැන්වීම පිලිබදව පුහුණුවක් ලබා නැත. එබැවින් එම කටයුතු සිදුකලයුතු ආකාරය පිලිබදව ක්රමවේදයක් අධ්යාපන අමාත්යාශයෙන් ලබා දෙන්නේ නම් ඒ අනුව ක්රියාත්මක විය හැකිය.
ඔන්ලයින් ඉගැන්වීම සදහා විවිධ මෘදුකාංග ඇත. පාසැල් කටයුතු සදහා ඔබ විසින් නිර්දේශ කරනු ලබන මෘදුකාංගය කුමක්ද? එම මෘදුකාංගයේ බලපත්ර සහිත පිටපතක් අධ්යාපන අමාත්යාංශය මගින් අප පාසලට ලබාදෙන්නේද? එය අප ලබා ගන්නේ කෙසේද?
අපගේ පාසැලේ බොහොමයක් ගුරුවරුන් ඔන්ලයින් ඉගැන්වීම ක්රමවත්ව සිදුකරන ආකාරය පිලිබද දැනුම අඩු මට්ටමක සිටි. ඔවුන්ට ඒ පිළිබදව විධිමත් පුහුණුවක් ලබාගත හැකි ක්රමවේදයක් අධ්යාපන අමාත්යංශය හරහා ක්රියාත්මක වන්නේද? එසේ නම් එම පුහුණුවට මාගේ පාසැලේ ගුරවරුන්ව සම්බන්ධ කර ගන්නේ කෙසේද? මේ දක්වා එවැනි පුහුණුවක් සිදුකරන බවට මා හට දැනුවත් වී නැත.
අපගේ පාසැලේ සිට දරුවන්ට ඔන්ලයින් ඉගැන්විම සදහා ප්රමාණවත් පහසුකම් නොමැත. එබැවින් ගුරුවරුන්ට තම නිවසේ සිට රාජකාරි සිදු කල යුතුව ඇත. එහෙත් ඒ සදහා ඔවුනට ප්රමාණවත් පහසුකම් නොමැති බව ඔවුන් විසින් මා හට දැනුවත් කර ඇත. ඔවුන්ගේ පුද්ගලික භාවිතටය ඇති දුරකතන හෝ පරිගණක මේ සදහා භාවිතා කරන ලෙසට ඉල්ලා සිටිමට මා හට සදාචාරාත්මක අයිතියක් නැත. ඔවුනට ඔවුන්ගේ පුද්ගලික උපකරණ භාවිතා කරන්නේ නම් ඒ වෙනුවෙන් යම් දීමනාවක් හෝ ලබා දෙන්නේ නම් ඔවුනට රාජකාරිමය පැවරීමක් කිරිමට මා හට හැකියාවක් ඇත.
පාසල යනු විෂය දැනුම ලබාදෙන ආයතනයක් පමණක් නොවන බව ඔබ තුමා දන්නා කරුණකි. පාසල තුල සිදුකරන ලබන විෂය බාහිර කටයුතු පිලිබද අධ්යාපන අමාත්යංශය මගින් ගෙන ඇති පියවර කුමක්ද? මාර්ගගතව සිදුකල හැකි ක්රියාකාරකම් පිලිබදව ඔබ විසින් කරනු ලබන යෝජනා මොනවාද?
තවද අප පාසලේ ඉගෙනුම ලබන දරුවන්ගෙන් බහුතරයක් ඔන්ලයින් අධ්යාපන කටයුතු සදහා සම්බන්ධ වීමට ක්රමවේදයක් නොමැති පිරිස් වේ. එම දරුවන් වෙනුවෙන් සිදුකිරිමට ඔබ විසින් යෝජනා කරනු ලබන වැඩපිලිවෙල කුමක්ද?
ගරු ලේකම් තුමනි, මෙම කාල සීමාව අප විසින් වෘත්තිය ක්රියාමාර්ග වල නිරත වන කාලයකි. ඒ පිලිබදව වෘත්තිය සමිති මගින් ඔබතුමාව දැනුවත් කර ඇත. ඔබ තුමා විසින් මේ වෙනුවෙන් ඉදිරිපත් කරනු ලබන ක්රමවේද වෘත්තිය ක්රියාමාර්ග වලින් ඉවත් වූ දිනක සිට ක්රියාත්මක කරන බවද දන්වමි. ස්තුතියි.
පිටපත්-
• විදුහලේ සියලුම අධ්යයන අනධ්යනය කාර්ය මණ්ඩලයට
• දෙමාපියන්ට